Amihan, Tail-end of Frontal System magdudulot ng pag-ulan sa ilang bahagi ng bansa
Umiiral ang Northeast Monsoon o Amihan at Tail-end of Frontal System sa ilang parte ng bansa.
Ayon kay PAGASA weather specialist Chris Perez, magdudulot ang weather systems ng maulap na kalangitan na may kalat-kalat na pag-ulan, pagkidlat at pagkulog.
Partikular na maaapektuhan nito ang Cagayan Valley, Cordillera Administrative Region (CAR), Aurora at Quezon sa Lunes ng gabi, December 21.
Dahil dito, babala ni Perez, mag-ingat na rin sa posibleng maranasang pagbaha o pagguho ng lupa.
Sa nalalabing bahagi naman ng Northern at Central Luzon, Calabarzon, Metro Manila, maaaring makaranas ng mahihinang pag-ulan dulot pa rin ng Amihan.
Sa bahagi naman ng Palawan, posible pa ring magdulot ang trough ng Tropical Depression Vicky ng maulap na kalangitan, mahinang pag-ulan at isolated thunderstorm.
Ani Perez, magiging maaliwalas na ang panahon sa Visayas at Mindanao.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.