Ayon kay PAGASA weather specialist Ana Clauren, nalusaw ang LPA bandang 2:00 ng hapon.
Ngunit, may panibagong binabantayang LPA sa labas ng teritoryo ng bansa.
Huli itong namataan sa layong 1,710 kilometers Silangan ng Mindanao.
Sinabi ni Clauren na malayo pa ang LPA sa bansa ngunit may posibilidad na pumasok sa Philippine Area of Responsibility (PAR).
Samantala, patuloy pa ring umiiral ang Tail-end of Frontal System at Northeast Monsoon o Amihan sa iba pang parte ng bansa.
Ani Clauren, magdudulot ang Tail-end of Frontal System ng maulap na kalat-kalat na katamtaman hanggang malakas na pag-ulan sa Cagayan Valley, Kalinga, Apayao, Mountain Province, Ifugao at Aurora.
Nakakaapekto naman ang Amihan sa nalalabing bahagi ng Hilagang Luzon na nagdudulot ng isolated light rains sa Ilocos region, Abra, Benguet, Zambales at Bataan.
Dahil sa maninipis na kaulapan, posible aniyang makaranas ng mga panandaliang pag-ulan sa Metro Manila at nalalabing bahagi ng bansa.