Malaking political party sa Cebu, kumalas sa pakikipag-alyansa sa UNA
Kumalas na sa pakikipag-alyansa sa United Nationalist Alliance (UNA) ang political party sa Cebu na One Cebu na pinamumunuan ng mga Garcia.
Sa isang press conference sa Cebu City, kinumpirma ni One Cebu Party president at gubernatorial candidate Winston Garcia na sila ay hihiwalay na ng alyansa sa UNA dahil sa umano ay pagbalewala sa kanila ng nasabing partido sa isinasagawang mga campaign sortie sa Cebu.
Paliwanag ni Garcia, ang pasya ay dumaan sa deliberasyon sa mga miyembro ng One Cebu Party.
Sa pahayag ng partido na binasa ni Garcia, sinabi nitong nakipag-alyansa sila sa UNA dahil sa paniwalang magiging patas ito sa kanila. “One Cebu entered into an alliance with UNA in the belief that it will be a partnerships of equals. UNA treated One Cebu like Imperial Manila treats the rest of the Philippines (with disrespect),” ayon sa pahayag.
Inihalimbawa ni Garcia ang isinagawang party rally ng UNA sa Lapu-Lapu City na hindi man lang naimbitahan ang One Cebu.
Maliban dito, hindi rin umano sila nabigyang impormasyon ng UNA hinggil sa mga sortie ni Vice President Jejomar Binay sa Carcar City, Dalaguete, Argao at Talisay City.
Hindi pa naman napagdedesisyunan ng One Cebu kung sino na ang kandidatong kanilang susuportahan dahil magsasagawa pa aniya sila ng konsultasyon sa kanilang mga lider sa Cebu.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.