Sa datos ng Department of Foreign Affairs (DFA) hanggang December 2, nasa 11,719 na ang mga kumpirmadong positibo sa COVID-19 na Filipino mula sa 82 na bansa at rehiyon.
Sa nasabing bilang, 3,327 ang patuloy na nagpapagamot sa iba’t ibang ospital.
Nasa anim naman ang bagong gumaling kung kaya 7,545 na ang overseas Filipinos na naka-recover sa nakakahawang sakit o na-discharge na sa ospital.
Wala namang bagong napaulat na nasawi.
Dahil dito, 847 pa rin ang COVID-19 related deaths sa mga Filipino abroad.
Pinakamarami pa ring naitalang confirmed COVID-19 positive na OF sa bahagi ng Middle East/Africa na may 7,544 na kaso.
Sumunod dito ang Europa na may 1,404 confirmed COVID-19 positive cases na OF.
Nasa 839 naman ang kaso sa Americas at 1,932 sa Asia Pacific Region.
Tiniyak ng DFA na sa pamamagitan ng Foreign Service Posts, tututukan ang lagay ng mga Pinoy sa ibang bansa at handang umasiste sa mga Filipino na apektado ng COVID-19 pandemic.
