Halos 400 katao, nahuling lumabag sa mga ordinansa sa Navotas City

Umabot sa 395 ang nahuling lumabag sa ipinatutupad na safety measures at iba’t ibang ordinansa sa Navotas City sa magdamag.

Batay ito sa ulat ng Navotas City police, Task Force Disiplina at mga barangay.

Nahuli ang nasabing bilang ng violators mula 5:00, Linggo ng hapon (November 8), hanggang 5:00, Lunes ng hapon (November 9).

Pinakamaraming nahuling lumabag sa curfew na umabot sa 224 kung saan 113 ang adult habang 111 ang menor de edad.

Sumunod dito ang mga hindi nagsuot o hindi tama ang pagkakasuot ng face mask na umabot sa 142.

Pito naman ang bilang ng mga hindi sumunod sa isa hanggang dalawang metrong physical distancing.

Samantala, anim ang nahuling walang suot na damit pang-itaas at 15 sa iba pang ordinansa.