Idinidiin ng Rizal Commercial Banking Corp. (RCBC) na ang kanilang branch manager na si Maia Santos-Deguito sa kontrobersyal na pag-lusot ng $81 million na dirty money sa bansa sa pamamagitan ng kanilang bangko.
Sa isinumiteng timeline at internal report ng RCBC headoffice sa Anti-Money Laundering Council (AMLC), lumalabas na inaasahan na ni Deguito ang pagpasok ng malaking pera sa kanilang bangko at tinulungan niya pa itong mabilis na mai-withdraw, sa tulong ng ilang tauhan niya sa kaniyang branch.
Dali-dali umanong pinroseso ni Deguito ang pagwi-withdraw ng pera, at sinabi niya pa sa ilang empleyado ng kanilang branch sa Jupiter St., Makati City na nangangamba siya sa buhay niya at ng kaniyang pamilya.
Noong February 5 ipinasok sa mga accounts nina Jessie Christopher Lagrosas, Alfred Vergara, Enrico Vasquez at Michael Cruz ang $81 million.
Sa araw na iyon rin pinasinayaan ni Deguito ang pagbubukas ng account ng negosyanteng si William S. Go, na mariin naman niyang pinabulaanan.
Itinuro ni Go si Deguito na kasabwat sa nasabing money laundering scheme, at umamin aniya si Deguito sa kaniya na siya ang gumawa ng account na iyon, pagkatapos ay inalok pa siya ng P10 million kung makikisakay na lamang siya dito.
Sa araw din na iyon, may $22.73 million ang na-withdraw sa account ni Lagrosas at idineposito naman sa account ni Go, pagkatapos ay isinalin naman ang $14.7 million nito sa remittance firm na Philrem.
Lumabas rin sa nasabing report na lahat ng mga debit documents tulad ng withdrawal slip ni Lagrosas, fund transfer forms at manager check applications ni William Go ay pawang mga walang pirma.
Nagkaroon pa ng mga pag-uusap sa pagitan nina Deguito at ni district sales head Nestor Pineda, regional sales head Briggite Capina, at outgoing RBG (retail banking group) head Raul Tan tungkol sa hold-out order.
Dito tiniyak ni Deguito na matagal na niyang kliyente ang mga may hawak ng accounts at maayos na lahat ng dokumento, kaya ini-lift na rin ng head office ang hold-out order.
Pagdating ng February 9, nakatanggap ang RCBC ng request mula sa Bangladesh Bank para pigilan ang transaksyon at i-freeze ang mga accounts para ma-imbestigahan ang mga ito.
Ngunit hindi agad ito sinunod ni Deguito at tinugunan pa niya ito ng email mula kay Capina na “OK to credit” na ang mga nasabing accounts, habang pinoproseso na nina cutomer service assistant (CSA) Reymart Marbella at senior customer relationship officer (CSRO) Angela Torres ang withdrawals at fund transfers.
Dahil sa pagtulong ng mga nasabing tauhan, hinihinalang ang buong branch ay na-kompromiso na.
Ayon naman sa customer service head at ng SCRO, sinabi umano sa kanila ni Deguito na mas pipiliin niyang iproseso na ang mga withdrawals kaysa naman mamatay siya at ang pamilya niya.
Samantala, hindi naman na-beripika ang mga identities nina Cruz, Lagrosas, Vergara at Vasquez dahil napag-alamang puro peke ang mga dokumentong ginamit para sa kanilang pagkakakilanlan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.