Nasawi sa pananalasa ng Typhoon Rolly umakyat na sa sampu

Nakapagtala na ng sampung nasawi dahil sa pananalasa ng Typhoon Rolly sa Bicol Region.

Sa datos mula sa Office of Civil Defense (OCD) siyam sa mga nasawi ay mula sa lalawigan ng Albay at isa sa Catanduanes.

Kabilang sa nasawi sa Albay ang tatlong katao mula sa bayan ng Guinobatan, dalawa mula sa Malinao, at tig-iisa sa Daraga, Oas, Polangui, at Tabaco City.

Nakapagtala din ng tatlong nawawala sa Guinobatan.

Umabot sa 180 bahay ang natabunan ng lahar sa naturang bayan.

Samantala, nakapagtala naman ng 108,831 na pamilya na inilikas o aabot sa 390,298 na katao.