Mga sigarilyo, ipagbabawal ng i-display sa mga tindahan sa Singapore

Napagbotohan na ng parliyamento ng Singapore ang pagbabawal ng pagdi-display ng mga sigarilyo sa mga tindahan.

Sinundan ng Singapore ang yapak ng Australia, Canada, New Zealand at UK sa polisiya ng cigarette display ban.

Simula sa taong 2017, kailangan ay tuluyan nang walang makikitang mga naka-display na sigarilyo sa mga tindahan, at pati na rin ang anumang advertisements tungkol dito, kabilang na ang online ads.

Ginawa ito ng Singapore para mas mapaigting pa nila ang pagbabawas sa nakakasamang bisyo ng paninigarilyo sa kanilang bansa, kahit pa ang bansang ito ay isa na sa may pinakamababang smoking rates sa buong mundo.

Bukod sa mismong mga pakete ng sigarilyo at mga advertisement, ipagbabawal na rin ang pagdi-display ng electronic-cigarettes.

Ayon kay Senior Minister of State for Health Amy Khor, bagaman mapalad sila na ang kanilang bansa ay isa sa may pinakamababang smoking prevalence, hindi sila dapat maging kampante.

Batid din aniya nila na mas nagiging agresibo na ang bentahan ng sigarilyo maging sa mga kabataan, kaya kailangan na nilang mas paigtingin pa ang pag-protekta nila sa kalusugan ng kanilang mga mamamayan.

Dagdag pa ni Khor, noong taong 2004 ay bumagsak sa all-time law ang smoking rate nila na nasa 12.6 percent, ngunit unti unti rin itong umakyat ng 13.3 percent pagdating ng 2013.

Ang Singapore ay kabilang sa mga bansang may pinakamababang smoking rates sa buong mundo dahil sa pinagsama-samang mga batas tulad ng nicotine taxes, ban sa print at broadcast advertising, at mas mahigpit na mga batas tungkol sa pagsi-sindi ng sigarilyo sa maraming bahagi ng lungsod.

TAGS: