Anti-COVID 19 vaccine ng Sinovac, lusot na sa PH panel review
May ‘go signal’ na para maikasa sa clinical trials sa bansa ang COVID-19 vaccine ng Sinovac Biotech ng China.
Ito ang inanunsiyo ni Food and Drug Administration (FDA) Dir. Gen. Eric Domingo na aniya, lusot na sa vaccine experts panel na pinamumunuan ng Department of Science and Technology ang Sinovac.
Ngunit ayon kay Domingo, kailangan pa ring makuha ng Sinovac ang pag-apruba ng Ethics Board Committee bago ito makahirit sa FDA ng pagkasa ng clinical trials.
Paliwanag nito, kapag lumusot na rin sa Ethics Board ang Sinovac, pag-aaralan nila ng hanggang tatlong linggo ang aplikasyon ng Sinovac.
Dagdag pa ng opisyal, kung walang magiging aberya, maaring sa Nobyembre ay maumpisahan na ang clinical trials.
Bukod sa Sinovac, interesado rin ang Gamaleya Research Institute ng Russia at ang Jannsen Pharmaceutical Companies ng Johnson & Johnson mula sa US na makapagsagawa ng clinical trials sa Pilipinas ang kanilang bakuna kontra sa nakakamatay na sakit.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.