Ayon sa Founder at Pangulo ng Lawyers for Commuters Safety and Protection (LCSP) na si Atty. Ariel Inton, hindi sapat ang 125,000 na pirasong beep card para sa libu-libong pasahero na sumasakay araw-araw.
Apela ni Inton, maghanap ng ibang beep card provider ang DOTr upang madagdagan ang card na magagamit ng mga pasahero.
Iminungkahi din nila ang paggamit ng QR code kapalit ng beep card, para sa mga single journey system para wala ng card na binabayaran.
Ngunit kung card naman daw ang gagamitin, ay maaaring maglagay ng advertisement na ilalagay sa card para ito ang gagastusin sa paggawa ng beep card.
Tutol din ang grupo na balikatin ng gobyerno ang gastos sa pagpapagawa ng card, dahil kukunin din sa buwis ng taumbayan ang gagamitin para dito.
Umapela si Inton, na sana ay manaig ang kapakanan ng Pilipinong pasahero at hindi ang monopolyong pagnenegosyo.