Karagdagang pondo sa ARTA at pagpapalakas sa batas ukol sa anti-red tape, iginiit
Iginiit ni Northern Samar Rep. Paul Daza na kailangang dagdagan ang ngipin ng batas para sa anti-red tape gayundin ang budget para dito.
Ayon kay Daza, kung gusto talagang masawata ang red tape sa burukrasya ay dapat na dagdagan ang ngipin ng batas laban sa red tape at dagdagan ang pondo ng Anti-Red Tape Authority (ARTA).
Hindi aniya kailangan na bumuo muli ng isang panibagong batas para lamang masugpo ang red tape sa pamahalaan.
Partikular na hiniling ni Daza na palakasin at amyendahan ang Ease of Doing Business and Efficient Government Service Delivery Act (RA 11032) at itaas ang pondo ng ARTA upang epektibong masupil nito ang mga lumalabag sa pamahalaan.
Sa ilalim kasi ng kasalukuyang batas, ang ARTA ay taga-rekomenda lamang ng pagpapasimple at pagpapabilis sa proseso at transaksyon sa gobyerno pero hindi naman ito ginawang mandatory sa mga ahensya gayundin ay wala ding kapangyarihan ang batas na magpataw ng parusa sa mga tiwaling opisyal.
Inirekomenda ng mambabatas na gawing mandatory ang pag-streamline sa transaksyon ng mga ahensya ng gobyerno at iminungkahi na parusahan ang sinumang opisyal na hindi susunod dito.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.