Ayon kasi kay PAGCOR chair at CEO Cristino “Bong” Naguiat, bagaman posible, hindi totoong sa casino pinakamadaling mag-linis ng iligal na pondo.
Sa katunayan aniya, sa casino ang pinakadelikadong maaring pagdaanan ng dirty money, kaya naman iba na lamang dapat ang imbestigahan ng mga otoridad.
Ito ang naging reaksyon ni Naguiat makaraang ipahayag ni Sen. Sergio Osmeña III na ang hindi pag-sama ng casino sa mga minomonitor alinsunod sa Anti-Money Laundering Act (AMLA) ang pinakamalaking pagkakamali sa nasabing batas.
Samantala, naurong naman ang pag-dinig ng Senado tungkol sa hinihinalang $100-M money laundering na idinaan sa mga casino dahil ang ilang opisyal ng mga bangko ay hindi available.
Imbis na sa March 8, sa March 14 na lang gagawin ang pag-dinig ayon na rin kay Osmeña.
Ayon pa kay Naguia, wala rin silang paraan para malaman kung iligal nga ba ang pinagmulan ng pera dahil trabaho ito ng bangko.
Wala ring makapagsasabi sa isang bangko na ang idine-depositong pera ay mula sa panalo sa casino dahil hindi naman aniya nagbibigay ng resibo o certificate man lang ang mga casino sa mga nanalo bilang patunay.
Pero giit niya, recorded naman lahat ng mga winnings kaya maaring makuha ng anumang ahensya ng pamahalaan ang ganitong impormasyon.
Bagaman sinabi ni Naguia na malabo itong mangyari, inumpisahan na rin aniya ng PAGCOR ang sarili nilang pag-iimbestiga tungkol sa ulat na aabot sa $100 milyon ang inilagak sa mga bank accounts ng tatlong casino.
Inaasahan nilang magsu-sumite na ng kani-kanilang komento tungkol sa alegasyon ang tatlong casino ngayong linggong ito.
Gayunman, naniniwala pa rin ang PAGCOR na ang Anti-Money Laundering Council (AMLC) ang nasa mas magandang posisyon para harapin ang isyu dahil umaasa lamang ang mga casino sa AMLC para sa gabay sa Philippine banking system.
Sinimulan na rin ng National Bureau of Investigation (NBI) ang kanilang imbestigasyon sa sinasabing pinakamalaking kaso ng money laundering sa bansa.