Typhoon Haishen, inaasahang papasok sa bansa sa Biyernes ng umaga

Patuloy na binabantayan ng PAGASA ang bagyo sa labas ng Philippine Area of Responsibility (PAR) na may international name na “Haishen.”

Ayon kay PAGASA weather specialist Chris Perez, huling namataan ang bagyo sa layong 1,610 kilometers Silangan ng Basco, Batanes bandang 3:00 ng hapon.

Wala pa rin aniyang direktang epekto ang bagyo sa anumang parte ng bansa.

Inaasahan aniyang Biyernes ng umaga, September 4, papasok ang bagyo sa Northeastern boundary ng bansa.

Oras na pumasok sa teritoryo ng bansa, tatawagin ang bagyo na “Kristine.”

Samantala, patuloy na umiiral ang mahinang Southwest Monsoon o Habagat sa dulong Hilagang Luzon.