Philippine Army kinumpirmang dalawang babaeng suicide bombers ang nagpasabog sa Jolo, Sulu

Kinumpirma ng Philippine Army (PA) na dalawang babaeng suicide bombers ang nasa likod ng magkasunod na pagsabog sa Jolo, Sulu kahapon.

Ayon kay Philippine Army Commanding General, Lt. General Cirilito Sobejana, isa dito ay Indonesian national.

Sinabi ni Sobejana na ang naturang babaeng bomber ay biyuda ng local terrorist na si Norman Lasuca.

Ang 23 anyos na si Lasuca ang kauna-unahang Pinoy suicide bomber na nagpasabog ng sarili sa isang military camp sa Indanan, Sulu noong June 2019.

Para tuluyang makumpirma ang pagkakakilanlan ng dalawang babaeng bombers, sinabi ni Sobejana na patuloy na kinakalap ang mga nagkalat na flesh sa bombing site upang maisailalim sa scientific testing.