Nais ni House Senior Minority Leader at Iloilo Rep. Janette Garin na mabigyan ng social amelioration ang mga asymptomatic at mild symptomatic COVID-19 cases.
Ayon kay Garin, hindi makakapagtrabaho ang mga ito dahil naka-quarantine at malaking tulong kung maisasama ang mga asymptomatic at mild cases sa mabibigyan ng financial aid ng pamahalaan.
P5,000 hanggang P8,000 na ayuda ang ipinabibigay ng kongresista sa mga asymptomatic at mild cases ng sakit upang may maitustos sa pamilya habang nasa isolation.
Samantala, suportado ng kongresista ang implementasyon ng MECQ pero iginiit nito na hindi pa rin solusyon ang pagsasailalim sa mga lugar sa mahigpit na community quarantine para mapababa ang kaso ng COVID-19.
Bagamat makakahinga ng bahagya ang health care system at mga medical frontliners ng bansa, kinakailangan pa rin aniyang sabayan ito ng whole nation approach at government efforts para tuluyang bumaba ang kaso ng sakit sa Pilipinas.