Dental data record system, nais itatag ng NBI
Plano ng National Bureau of Investigation na magtatag ng dental data record system o kalipunan ng lahat ng dental record ng mga Pilipino sa buong bansa.
Sa isang forum na inorganisa ng NBI Forensic Investigation Service na dinaluhan ng nasa 300 dentista at mga forensic practitioners, sinabi ni NBI Director Virgilio Mendez na makatutulong nang malaki sa pag-iimbestiga kung may dental record na hawak ang NBI at law enforcement agencies.
Sa isang kalamidad halimbawa, mas madali ang victim identification kahit masunog o maagnas ang bangkay ng biktima.
Mas praktikal ding gamitin ang dental records kung ikukumpara sa DNA testing.
Nabatid na noong 1978, naisabatas ang Presidential Decree No. 1575 na nagtatakda sa mga dentista na itagong mabuti ang dental record ng pasyente at isumite ito sa NBI pagkalipas ng 10 taon.
Subalit tila nakatulog na ang batas na ito lalo’t walang modernong pasilidad ang NBI para sa pag-iingat ng milyun-milyong dental records.
Sinabi naman ni Nick Suarez, tagapagsalita ng NBI na hinihintay pa nilang maipasa ang Modernization Act na nakabinbin sa Kongreso para magkaroon ng pondo para sa proyekto.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.