4 na health center sa Pasig City isinara; health workers isinailalim sa COVID-19 test

Apat na health centers sa Pasig City ang pansamantalang isinara habang hinihintay ang resulta ng COVID-19 test ng mga health worker nito.

Sa kaniyang Facebook post, sinabi ni Pasig City Mayor Vico Sotto na kabilang sa isinara ang mga health center sa sumusunod na lugar:

1. Maybunga Floodway
2. Napico
3. Manggahan Super HC
4. Caniogan

Ang mga health worker sa Maybunga, Napico at Manggahan ay naisailalim na sa swab test at hinihintay na lamang ang resulta.

Habang ang mga health worker sa Caniogan ay nakasailalim sa quarantine at nakatakdang kuhanan na ng swab.

Kung mayroong concern na nangangailangan ng agarang pagtugon, sinabi ni Sotto na maaring tumawag sa Operation Center sa numerong 864-300-00.

“Pakiusap na wag dumiretso sa ospital (lalo na’t madalas mapuno ang mga ospital ngayon at baka hindi rin kaya ng mapupuntahan ninyo),” ayon kay Sotto.