RTVM isinailalim sa lockdown; 2 staff nagpositibo sa COVID-19
Dalawang staff ng Radio Television Malacañang (RTVM) ang nagpositibo sa COVID-19.
Kinumpirma ito ni Demic Pabalan, executive director ng RTVM.
Ayon kay Pabalan, isinailalim sa lockdown ngayon ang RTVM at kinansela na ang coverage sa programa ni Presidential Legal Counsel Salvador Panelo.
Dalawang tauhan kasi nila ang nagpositibo sa COVID-19 na kapwa asymptomatic.
Isinailalim na rin sa testing ang lahat ng tauhan ng RTVM na nalantad sa dalawang nagpositibong empleyado.
Sa Linggo naman, isang araw bago ang State of the National Address (SONA) ni Pangulong Rodrigo Duterte, isasailalim sa swab test ang mga personnel ng RTVM na nakatalaga para mag-cover ng SONA.
Una nang sinabi ng residential Communications Operations Office (PCOO) na sa SONA ng pangulo, tanging ang Presidential Broadcast Staff – Radio Television Malacañang (PBS-RTVM) ang papayagang mag-cover sa loob ng House of Representatives.
Pinapayuhan ang lahat ng media network na mag-hook up na lang sa live feed ng PTV o sa live stream ng PCOO at RTVM Facebook Pages.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.