Passenger ship nasunog sa karagatang sakop ng Catmon, Cebu
Tinupok ng apoy ang isang passenger ship sa karagatang sakop ng bayan ng Catmon sa Cebu.
Naganap ang sunog alas 10:00 ng gabi ng Huwebes July 23.
Ayon kay Commander Alvin Dagalea, tagapagsalita ng Philippine Coast Guard in Central Visayas (PCG-7), ligtas naman ang kapitan at lahat ng 47 crew members ng MV Filipinas Dinagat.
Nagawa nilang makaalis lahat ng barko bago lumaki ang apoy.
Wala namang pasahero o rolling cargoes na sakay ang barko nang mangyari ang sunog.
Ang MV Filipinas Dinagat ay pag-aari ng Cokaliong Shipping Lines.
Ayon kay Dagalea, umalis ang barko sa Pier 1 sa Cebu City alas 7:00 ng gabi ng Huwebes at patungo dapat sa Palompon, Leyte.
Dakong alas 10:00 ng gabi nang nakatanggap ng distress call ang coast guard mula sa nasabing barko.
Agad namang naipadala ng PCG-7 ang BRP Suluan (MV-4406) sa lugar.
95 percent ng barko ang natupok.
Magsasagawa ng imbestigasyon ang PCG-7 upang matukoy kung ano ang pinagmulan ng sunog.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.