Mga kumpanya ng langis may dagdag sa presyo ng LPG simula ngayong araw

Epektibo ngayong unang araw ng buwan ng Hulyo ang dagdag sa presyo ng Liquified Petroleum Gas (LPG) ng mga kumpanya ng langis.

Sa abiso ng kumpanyang Petron, epektibo alas 12:01 ng madaling araw (Miyerkules, July 1) may dagdag na 50 centavos sa kada kilo ng kanilang LPG.

Mangangahulugan ito ng dagdag na P5.50 sa kada 11-kilogram na LPG cylinder.

Nagpatupad din ng dagdag na 30 centavos sa bawat litro ng AutoLPG ang Petron.

Ganito rin ang halaga ng dagdag presyo ng kumpanyang Phoenix Petroleum sa kanilang LPG at AutoLPG.

Habang ang kumpanyang Solane naman, 45 centavos ang dagdag sa bawat kilo ng LPG o P4.95 na dagdag sa bawat 11-kilogram LPG cylinder epektibo alas 6:00 ngayong Miyerkules ng umaga.