Postmaster general kinasuhan dahil sa hindi pagre-remit ng GSIS premiums
Ipinag-utos ng Office of the Ombudsman ang pagsasampa ng mga kaso laban kay Philippine Postal Service (Philpost) postmaster general Josefina Dela Cruz dahil sa kabiguan na mai-remit ang bayad ng isang kawani sa kanyang loan sa Government Service Insurance System o GSIS.
Base sa resolusyon na ipinalabas ni Ombudsman Conchita Carpio-Morales sinabi nito na may probable cause para sampahan ng 15 counts ng violation sa Republic Act 8291 o ang GSIS Act of 1997 si Dela Cruz pati na sina Philpost Eastern Mindanao Director Bernardito Gonzales at Arlene Bendanillo ng Philpost sa Zamboanga City.
Sa isinagawang imbestigasyon ng Ombudsman, nabigo ang Philpost na mai-remit sa GSIS ang loan amortizations ng empleyadong si Santos Pamatong Jr. mula October 2011 hanggang December 2012.
Depensa naman ni Dela Cruz, dahil sa kakulangan ng pondo kaya prayoridad nila ang net take home pay ng kanilang mga empleyado at operating costs kesa sa remittance sa GSIS premiums at loan amortizations.
Ngunit ang katuwiran na ito ni Dela Cruz ay ibinasura ng Ombudsman dahil sa kakulangan ng pruweba.
Base sa GSIS Act, responsibilidad ng mga namumuno sa mga opisina o ahensiya ng gobyerno na may contributions, amortizations at accounts sa GSIS na i-remit ito sa loob ng 30 araw.
Ang mga mabibigo na sumunod kapag napatunayang nagkasala ay maaring makulong ng isa hanggang limang taon bukod pa sa pagmumultahin.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.