Ilang lugar sa Luzon, patuloy na uulanin

Makakaranas pa rin ng pag-ulan ang ilang lalawigan sa Luzon.

Batay sa thunderstorm advisory hanggang 12:52 ng tanghali, iiral ang katamtaman hanggang mabigat na buhos ng ulan na may kidlat at malakas na hangin sa Tarlac, Pampanga, Bulacan, Laguna at Batangas.

Mararamdaman din ang pag-ulan sa Zambales partikulat sa Santa Cruz, Candelaria, Masinloc, Palauig, Iba at Botolan; Cavite sa Maragondon at Ternate.

Ayon sa PAGASA, mararamdaman ang pag-ulan sa mga nabanggit na lugar sa susunod na dalawang oras.

Dahil dito, pinayuhan ng weather bureau ang mga residente sa naturang lugar na maging maingat sa posibleng pagbaha o pagguho ng lupa.