Presidential power sa pag-postpone ng school opening, okay na sa Senado
Aprubado na sa Senado ang panukala na bigyang kapangyarihan sa pangulo ng bansa na ipagpaliban ang pagbubukas ng mga klase.
Pinasalamatan naman agad ni Sen. Sherwin Gatchalian ang mga kapwa senador na sinuportahan ang Senate Bill No. 1541 at agad itong ipinasa bago ang sine die adjournment ng Kongreso.
Kapag naging batas, magkakaroon na ng kapangyarihan ang pangulo ng bansa at kalihim ng Department of Education o DepEd na ipagpaliban ang school opening kapag malaking isyu pa rin ang COVID-19 sa kaligtasan ng mga mag-aaral.
Una nang inanunsiyo ng DepEd ang pagsisimula muli ng mga klase sa Agosto 24.
Base sa umiiral na Republic Act 7797, ang pagbubukas ng mga klase sa bansa ay dapat isagawa sa unang araw ng Lunes ng Hunyo hanggang sa huling araw ng Agosto.
“Natutuwa po ako at nakapasa na sa senado ang panukalang batas na ito. Mahalaga ang pagpasok sa eskuwelahan ng mga bata, pero higit na mahalaga ang kanilang kaligtasan at kalusugan. Kaya bigyan po natin ng pagpapasya ang Pangulo ng Pilipinas at ang Kalihim ng Edukasyon upang baguhin ang petsa ng pasukan sa panahon ng pandemya habang walang kasiguraduhan sa kaligtasan at kalusugan ng kabataang Pilipino,” ayon sa senador.
Ang Senate Bill 1541 ay pinag-isang panukala nina Sens. Joel Villanueva, Francis Tolentino, at Senate President Vicente “Tito” Sotto III.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.