Bilang ng pamilyang nakararanas ng gutom sa bansa, dumoble – SWS
Halos dumoble ang bilang ng mga pamilyang Filipino na nakararanas ng pagkagutom, ayon sa Social Weather Stations (SWS).
Batay sa COVID-19 Mobile Phone Survey ng SWS, umabot sa 16.7 porsyento o katumbas ng 4.2 milyong pamilya ang nakararanas ng “involuntary hunger” dahil sa kakulangan ng pagkain.
Malaki ang itinaas nito kumpara sa naitalang 8.8 porsyento o 2.1 milyong pamilya noong December 2019.
Sa nasabing hunger rate, 13.9 porsyento rito o 3.5 milyong pamilya ang nakakaranas ng “moderate hunger” habang 2.8 porsyento naman ang “severe hunger.”
Ang moderate hunger ay ang mga pamilya na nakakaranas “only once” o “a few times” ng pagkagutom sa nakalipas na tatlong buwan.
Ang severe hunger naman ay ang mga pamilyang dumaranas “often” o “always” ng pagkagutom sa nakalipas na tatlong buwan.
Lumabas din sa survey na 99 porsyento o halos lahat ng pamilya ay nakatanggap ng tulong mula sa gobyerno simula nang magkaroon ng COVID-19 crisis.
Isinagawa ang SWS May 2020 COVID-19 Mobile Phone Survey gamit ang mobile phone at computer sa pamamagitan ng telephone interviewing sa 4,010 working-age Filipinos sa buong bansa.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.