Pilipinas, nasa second wave na ng COVID-19 – Duque

Inihayag ng Department of Health (DOH) na nasa second wave na ng COVID-19 ang Pilipinas.

Sa pagdinig ng Senado, nilinaw ni Health Secretary Francisco Duque III na itinuturing na first wave ang pag-uumpisa ng COVID-19 sa bansa.

Batay aniya sa mga epidemiologist, nangyari ang first wave ng nakakahawang sakit noong Enero kung kailan naitala ang unang tatlong COVID-19 cases sa Chinese nationals mula Wuhan City.

Tiniyak naman ng kalihim na kumikilos ang kagawaran para ma-flatten ang curve ng COVID-19 sa Pilipinas.

Layon din aniya nitong magkaroon ng sapat na panahon ang gobyerno upang mapaunlad ang kapasidad ng health system sa bansa.