Sa panayam ng Radyo Inquirer sinabi ni Labor and Employment Sec. Silvestre Bello III na hindi mapwersa ng pamahalaan ang mga kumpanya na mag-provide ng shuttle o sleeping quarters sa kanilang mga empleyado.
Pero kung ang isang kumpanya ay bigong makapag-provide ng shuttle service o sleeping quarters sa kanilang mga empleyado, hindi rin naman nila mapupwersa ang mga trabahador nilang pumasok sa trabaho.
Lalo aniyang hindi pwedeng gamiting “ground for dismissal” o “disciplinary action” kung ang empleyado ay hindi makapasok dahil walang masakyan.
Kung talaga aniyang gusto ng mga kumpanya na makabalik na sa operasyon ay dapat bigyan nila ng shuttle service ang mga empleyado nila, o kaya naman ay maglaan ng pwesto sa opisina na matutulugan.