Trabaho sa gov’t offices sa Camarines Norte, sinuspinde dahil sa Typhoon Ambo

Suspendido ang trabaho sa lahat ng tanggapan ng gobyerno sa Camarines Norte sa Biyernes, May 15.

Sa inilabas na executive order, sinabi ni Governor Edgardo Tallado na ito ay bunsod ng posibleng epekto ng Typhoon Ambo sa probinsya.

Pagdating sa mga pribadong sektor, sinabi ng gobernador na depende ito sa magiging pasya ng pamunuan ng mga kumpanya.

Nakataas naman sa full alert ang PDRRMO, MDRRMO at iba pang frontline offices para maging handa sa pagresponde sa magiging epekto ng bagyo sa Camarines Norte.

Sa severe weather bulletin ng PAGASA, huling namataan ang Typhoon Ambo sa bisinidad ng Catarman, Northern Samar dakong 7:00, Huwebes ng gabi (May 14).