Sa virtual presser, sinabi ni Health Undersecretary Maria Rosario Vergeire na bahagi ito ng pagpapatigting ng testing capacity at pagpapadami ng quarantine facilities hindi lang sa Metro Manila kundi maging sa iba pang probinsya sa bansa.
Sinabi pa nito na makatutulong ang aniya’y “state of the art laboratory” para madagdagan ang maisasagawang pagsusuri at pag-aaral sa sakit.
“Ang pagbubukas ng nasabing laboratoryo ay isang malaking hakbang tungo sa ating ‘new normal’ sapagkat ang laboratoryo na ito ay makakadagdag sa atin ng 3,000 tests kada araw sa ating national daily testing capacity,” pahayag nito.
Ayon naman kay Kelly Bird, Country Director ng Southeast Asia Department Asian Development Bank Philippines Country Office, makatutulong ang laboratoryo para maabot ng kagawaran ang target na 30,000 tests kada araw.
Magagamit din aniya ang laboratoryo para makapagsagawa ng pag-aaral sa iba pang mga sakit sakaling matapos na ang COVID-19 pandemic.