MILF aminadong marami ang dismayado sa kanilang hanay
Kinumpirma ng Moro Islamic Liberation Front (MILF) na dismayado ang kanilang grupo at ilang mga Muslim organizations sa Mindanao sa pag-abandona ng Kongreso sa Bangsamoro Basic Law (BBL).
Sinabi ni MILF peace panel chair Mohagher Iqbal sa kanyang pakikipag-usap kay United Nations Undersecretary General Adama Dieng na galit ang ilan sa kanilang mga kasamahan sa kinahinatnan ng BBL.
Pero tiniyak ni Iqbal na mananatili silang tahimik sa isyu habang hinihintay ang magiging tugon ng Malacañang sa nasabing usapin.
Sa kanilang pulong, tiniyak din ni Iqbal na hindi mauuwi sa panibagong armed conflict ang kinahinatnan ng BBL dahil kontrolado daw nila ang kanilang puwersa.
Sa kanyang panig, sinabi naman ni Dieng na dapat ay maghanap ng iba pang paraan ang pamahalaan at MILF para hindi mabalewala ang nasimulan nang usapan tungo sa kapayapaan sa Muslim Mindanao.
Si Dieng ay siya ring senior adviser on the prevention of genocide ni U.N Secretary-General Ban Ki-moon.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.