Mga pasahero dumanas ng matinding perwisyo; pila sa MRT-3 humaba, pahirapan din ang pagsakay sa bus

Matinding perwisyo ang naranasan ng mga pasahero sa pagpasok sa trabaho ngayong araw ng Lunes, March 16, 2020.

Humaba nang husto ang pila ng mga pasahero sa MRT-3 dahil sa ipinatutupad na limitasyon sa pagpapasakay ng pasahero upang masunod ang ‘one-meter social distancing policy’.

Sa Magallanes station at Guadalupe umabot sa ibaba sa kahabaan ng EDSA ang pila ng mga pasahero.

Hindi rin madali ang mag-bus na lamang kahit wala namang masyadong traffic sa EDSA.

Pahirapan din kasi ang pagsakay sa bus dahil ipinatutupad din ang limitasyon sa mga pasahero.

One-seat apart kasi dapat ang pinaiiral sa mga bus para sa social distancing.