Pinabulaanan ng Department of Health (DOH) na mayroong pinaghihinalaang kaso ng Middle East Respiratory Corona Virus o MERS-COV na inoobserbahan sa Cagayan de Oro City.
Ayon kay DOH Spokesperson Dr. Lyndon Lee Suy, walang history ng travel sa Gitnang Silangan ang pasyente at hindi rin ito nakisalamuha sa sinumang galing Middle East.
Galing anya sa Singapore ang babae na kasalukuyang ginagamot sa Northern Mindanao Medical Center (NMMC) na wala namang kaso ng MERS-COV.
Sinabi ni Lee Suy na maaring pulmunya o trangkaso ang sakit ng pasyente na dumating ng bansa noong February 2, 2016.
Nauna nang napaulat na inoobserbahan sa MERS-COV ang pasyente dahil sa pagkakaroon nito ng ubo at lagnat.
Ayon sa pamunuan ng NMMC, inilagay sa isolation room sa 3rd floor ng ospital ang babae bilang precautionary measure.
Binanggit pa ng NMMC na kinuhanan na ng sample ang pasyente at tatagal ng tatlong araw bago lumabas ang resulta nito para matukoy kung positibo o negatibo sa sakit ang babae.