Pangulong Duterte, sinuspinde ang klase sa Metro Manila bunsod ng COVID-19

Sinuspinde ng Palasyo ng Malakanyang ang klase sa Metro Manila bilang pag-iingat sa Coronavirus Disease (COVID-19).

Ito ang inanunsiyo ni Pangulong Rodrigo Duterte sa isang press conference sa Malakanyang, Lunes ng gabi.

Sakop aniya nito ang lahat ng antas sa mga pampubliko at pribadong paaralan sa Metro Manila.

Gayunman, sinabi ng pangulo na home study muna o kailangang ipagpatuloy ng mga estudyante ang pag-aaral sa kanilang bahay.

Hindi naman pinaboran ng pangulo ang panukalang suspensyon ng pasok sa tanggapan ng gobyerno.