Pinaghahanap ng mga otoridad ang dalawang suspek sa robbery na nanloob sa isang unit sa Berlin Building, Kassel Residences, Barangay Moonwalk Parañaque City.
Pinasok ng dalawang suspek kaninang madaling araw ang unit 403 pero natunungan sila ng mga guwardya at kaya agad nakatawag ng pulis.
Nakaresponde naman agad ang mga tauhan ng Parañaque City Police kasama ang mga miyembro ng SWAT.
Pero nagkulong ang mga suspek sa loob ng unit na kalaunan ay nasunog. Ayon kay Parañaque City Police Chief Sr. Supt. Ariel Andrade, sinadyang sunugin ng mga suspek ang unit para sila ay makatakas.
Bago lumiyab ang apoy, tatlong beses pang tinangka ng mga pulis na pasukin ang unit pero sinasalubong sila ng putok ng baril mula sa mga suspek na nagtatago sa loob.
Reklamo naman ng mga residente, paanong napapasok ng mga salarin ang kanilang lugar na isang exclusive residential building.
Hinala din ng mga nakatira sa building, maaring umupa ng isang unit ang mga salarin para maisagawa ang panloloob.