Pagkamatay ng isang babae sa glutathione vaccine pinaiimbestigahan na ni Mayor Isko Moreno

Inatasan na ni Manila Mayor Isko Moreno ang mga hepe ng kanilang Health at Permits and Licenses Bureaus na imbestigahan ang pagkamatay ng isang babae matapos magpaturok ng glutathione sa isang spa sa Sampaloc.

Ayon kay Cesar Chavez, ang chief of staff sa Office of the Mayor, pinakokolekta lahat ni Moreno ang mga impormasyon kaugnay sa pagkamatay ng 33-anyos na si Shyril Distor.

Nagpaturok ng glutathione si Distor sa Glutaholics Spa.

Sa paunang impormasyon mula sa MPD, nawalan ng malay si Distor matapos maturukan ng glutathione.

Agad isinugod sa UST Hospital si Distor ngunit namatay na rin ito.

Nabatid na naturukan ang biktima ng Aqua Skin-Diamond Pro Ultra White-140, na gawa ng Skinnic Laboratorie at isang ampule ng ascorbic acid na Vitarex – C na mula sa Grand Pharmaceutical.

Ayon kay Chavez depende sa makakalap nilang impormasyon ang susunod na hakbang ng lokal na pamahalaan.

Aniya isa sa titingnan ay ang posibilidad ng kapabayaan sa bahagi ng establismento.