DFA may abiso sa mga passport applicant na apektado ng flights cancellations dahil sa nCoV

Inabisuhan ng Department of Foreign Affairs (DFA) ang mga aplikante para sa passport at passport renewal na apektado ng flight cancellations dahil sa 2019 novel coronavirus.

Ayon sa DFA, maaring may mga aplikante para sa passport ang hindi makakapunta sa kanilang appointment sa consular offices dahil sa nakansela ang kanilang biyahe o kaya naman ay kabilang sila sa naisailalim sa 14-day quarantine.

Ang mga hindi nakapunta o makakapunta sa consular services base sa schedule ng kanilang appointment ay maari pa rin silang i-accommodate ng DFA.

Bibigyan sila ng 30 araw mula sa petsa ng kanilang appointment para magtungo sa consular office kung saan sila naka-schedule.