Bilang ng kaso ng coronavirus sa Malaysia, umabot na sa walo

Nadagdagan pa ang bilang ng naitalang kaso ng 2019-novel coronavirus (nCoV) sa Malaysia.

Ayon kay Noor Hisham Abdullah, director-general ng Health Ministry sa Malaysia, isang 48-anyos na Chinese national ang nagpositibo sa nasabing virus.

Ang panibagong kaso ng sakit ay nakasalamuha aniya ng ika-pitong pasyente na kumpirmadong may coronavirus.

Naka-admit ang pasyente sa isolation ward sa Hospital Permai Johor Baru.

Samantala, sinabi naman ni Home Minister Muhyiddin Yassin na hinarang ang nasa 14 katao na dumating sa Kuala Lumpur International Airport matapos mapag-alamang nanggaling sa Wuhan City, China.