‘China travel ban,’ dapat nang ipatupad – Sen. Hontiveros

Sa pagkumpirma ng Department of Health (DOH) na may kaso na ng 2019 novel coronavirus sa bansa, iginiit ni Senator Risa Hontiveros ang agarang pagpapatupad ng ‘travel ban’ sa lahat ng mga pumasok sa bansa mula sa China sa nakalipas na dalawang buwan.

Pagdidiin ni Hontiveros ang kanyang inihihirit ay pansamantala at hanggang 30 araw lang.

Kasabay nito, hinihimok niya ang Bureau of Quarantine (BOQ) na magpatupad ng mandatory quarantine sa lahat ng mga nagmula sa China at pag-aralan ang ipinatutupad na safety measures ng ibang bansa kung saan may kumpirmadong kaso ng nCoV.

Aniya, habang epektibo ang traval ban, dapat ay magpatupad na ng lahat ng klase ng safeguards ang DOH sakaling madagdagan pa ang kumpirmadong may taglay ng virus sa bansa.

Hiling din niya na maging ang mga opisyal ng barangay ay maging mapagmatyag sa kanilang nasasakupan para hindi na kumalat ang sakit.