Mahigit 70 hayop nasagip ng PNP-Maritime Group sa Talisay

Pinangunahan ng mga miyembro ng PNP Maritime Group ang pagsagip sa mga naiwang domestic animals sa isla ng Taal Volcano.

Umabot sa 70 hayop na karamihan ay kabayo ang nasagip ng mga pulis.

Sa mga larawan na ibinahagi ng PNP Maritime Group, makikitang balot ng abo ang mga kabayo na nasagip.

Agad na pinakain ang mga hayop na pawang nanghihina na matapos maiwan ng ilang araw sa isla.

Maraming kabayo sa isla dahil ito ang pangunahing pangkabuhayan ng mga residente doon.

Isinasakay kasi sa kabayo ang mga turista na nagtutungo sa Taal Lake.