Pulis patay, asawa sugatan sa ambush sa Bohol
Nasawi ang isang pulis habang sugatan ang kanyang asawa matapos pagbabarilin habang nasa loob ng kanilang sasakyan sa Brgy. Guiwanon, Maribojoc, Bohol, Lunes ng gabi.
Ayon kay Bohol Provincial Police Office director Police Col. Jonathan Cabal, ang nasawing biktima ay kinilalang si Police Cpl. Arnel Bayot, miyembro ng Provincial Mobile Force Company (PMFC).
Pauwi na anya si Bayot kasama asawang si Richelle sa bayan ng Tubigon nang pagbabarilin sila ng hindi pa nakikilalang mga suspek bandang alas-8:00 ng gabi.
Tadtad ng bala ang passenger side window ng sasakyan ng dalawa.
Nagtamo ng maraming tama ng bala si Bayot habang natamaan sa braso at hita ang kanyang asawa.
Isinugod pa sa Maribojoc District Hospital ang pulis ngunit idineklara ring dead-on-arrival.
Ginagamot naman ngayon si Richelle sa Gov. Celestino Gallares Memorial Hospital sa Tagbilaran.
Nakuha sa crime scene ang 19 na basyo ng bala at iniimbestigahan na ang motibo sa krimen at ang pagkakakilanlan ng mga suspek.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.