Tail-end of a cold front nakaaapekto sa S. Luzon at E. Visayas

Walang namamataang sama ng panahon na makaaapekto sa loob ng Philippine Area of Responsibility (PAR) sa susunod na dalawa hanggang tatlong araw.

Ayon sa 4am weather update ng PAGASA, tail-end of a cold front at northeast monsoon o Amihan pa rin ang umiiral na weather systems sa bansa.

Dahil sa tail-end of a cold front, asahan ang maulap na kalangitan na may kalat-kalat na pag-ulan, pagkulog at pagkidlat sa Bicol Region, Romblon, Marinduque, Oriental Mindoro at Samar Provinces.

Magdadala naman ang Amihan ng maulap na kalangitan na may kalat-kalat na mahihinang pag-ulan sa Cagayan, Isabela, Nueva Vizcaya, Quirino, Apayao, Kalinga, Mountain Province, Ifugao, Aurora at Quezon.

Sa Metro Manila at nalalabing bahagi ng bansa, asahan ang maalinsangang panahon na may posibilidad lamang ng mga panandaliang pag-ulan.

Dahil sa bugso ng Amihan, nakataas ngayon ang gale warning at ipinagbabawal ang paglalayag sa mga baybaying-dagat ng:
– Batanes
– Calayan
– Babuyan
– Cagayan
– Isabela
– Northern coast ng Ilocos Norte
– Aurora
– Northern Quezon
– Northern at eastern coast ng Polillo Islands
– Camarines Norte
– Northern coast ng Camarines Sur
– Eastern coast ng Sorsogon
– Northern at eastern coast ng Catanduanes
– Northern Samar
– Eastern Samar