Natupok ng apoy ang hindi bababa sa 70 bahay sa Sitio Cepadul Uno at Dos ng Brgy. Duljo Fatima, Cebu City, Huwebes ng hapon.
Ayon kay Bureau of Fire Protection (BFP) – Cebu City ground commander Senior Fire Inspector Arnel Abella, nagsimula ang sunog alas-4:35 sa bahay ng isang Judith Campaña sa Sitio Cepadul Uno.
Agad na kumalat sa dalawang sitio ang apoy dahil gawa ang mga bahay sa light materials at malakas na hangin.
Halos kalahating oras pa lang o ganap na 5:06 ng hapon ay itinaas sa ikaapat na alarma ang sunog.
Nakontrol ang sunog alas-5:55 ng hapon.
Maswerte namang walang nasugatan o namatay sa sunog maliban na lamang sa isang 16-anyos na babae na isinugod sa Cebu City Medical Center matapos mag-hyperventilate.
Aabot sa P150,000 ang pinsala sa ari-arian ng apoy at inaalam pa ang sanhi nito.