Audio recording hindi pwede sa Senate probe bilang ebidensiya ayon kay Drilon
Nilinaw ni Senate President Franklin Drilon na hindi puwedeng gamitin sa congressional inquiry ang audio recording na sinasabing may kaugnayan sa balak ng pamahalaan na pagtatakip sa imbestigasyon sa Mamasapano encounter.
Sinabi ni Drilon na sa nakapaloob sa R.A 4200 o Anti-wiretapping Law na pwedeng makulong ang gumawa o nagpakalat ng mga ganitong uri ng materyales.
Ipinaliwanag din ni Drilon na ayon sa section 4 ng nasabing batas, ang audio recording mula sa hindi beripikadong source ay hindi pwedeng tanggapin sa mga pagdinig tulad ng sa Senado.
Pero nilinaw ng nasabing opisyal na hindi nila pinagtatakpan ang katotohanan sa isyu at bahala na raw ang komite ni Sen. Grace Poe kung papayagan ang pagpe-presinta ng nasabing ebidensya.
Nauna dito ay sinabi ni retired Philippine National Police (PNP) Director Diosdado Valeroso na hawak siyang audio recording ng isang mataas na opisyal ng pamahalaan at isang mambabatas na nag-uusap kung paano ililigtas ang pamahalaan sa pananagutan sa Mamasapano encounter.
Sa pagpapatuloy ng Senate inquiry kaugnay sa nasabing isyu sa Miyerkules ay ipi-prisinta ni Valeroso ang nasabing voice recording.
Sa panayam ng Radyo Inquirer, nilinaw ni Valeroso na hindi siya kabilang sa mga sinasabing bagong testigo na ihaharap sa hearing ni Sen. Juan Ponce Enrile.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.