Nagpaalala ang pamahalaang-lungsod ng Muntinlupa na ipinagbabawal ang lahat ng uri ng paputok sa lungsod gayundin ang open-pipe mufflers na karaniwan sa mga motorsiklo ngayong Kapaskuhan.
Ipinag-utos na ni Mayor Jimmy Fresnedi sa lokal na pulis na magsagawa ng checkpoints at inspections para matiyak na nasusunod ang ‘firecracker ban.’
Kasabay nito, ang pagkasa ng clearing operations sa mga lansangan at maging sa mga pamilihan para matiyak na walang lumalabag sa City Ordinance 14-092.
Noong nakaraang araw ng Linggo, nagsagawa ng operasyon sa Alabang viaduct para hulihin ang mga nagtitinda ng mga paputok.
Sa ordinansa, ang mga lalabag ay pagmumultahin ng P1,000 hanggang P5,000 at ang mga lehitimong negosyo na magbebenta ay babawian ng kanilang business permit at license.