Operasyon ng NAIA, isususpinde nang 12 oras sa Martes bunsod ng Typhoon #TisoyPH
Suspendido nang 12 oras ang operasyon ng Ninoy Aquino International Airport (NAIA), araw ng Martes, December 3.
Sa isang press conference, ipinaliwanag ni Manila International Airport Authority (MIAA) General Manager Ed Monreal na isasara ang NAIA Terminals 1 hanggang 4 dahil sa Typhoon “Tisoy.”
Isasara ang paliparan simula 11:00 ng umaga hanggang 11:00 ng gabi.
Ani Monreal, layon ng hakbang na matiyak ang kaligtasan ng mga pasahero kasunod ng inaasahang pananalasa ng bagyo.
Inabisuhan naman ang mga pasahero na manatili muna sa kani-kanilang tahanan sa kasagsagan ng bagyo.
Pinayuhan din ang mga pasahero na makipag-ugnayan sa airline company.
Oras na bumalik ang operasyon, bibigyang-prayoridad ang mga scheduled flight.
Ipatutupad naman ang ‘first come, first served’ basis sa mga recovery flight.
Nasa 480 flights ang inaasahang maaapektuhan ng pagsasara ng paliparan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.