Ilang lugar sa Luzon, patuloy na uulanin

Patuloy na makararanas ng pag-ulan ang ilang lalawigan sa Luzon.

Batay sa thunderstorm advisory ng PAGASA bandang 1:20 ng hapon, mararamdaman ang katamtaman hanggang malakas na buhos ng ulan na may kasamang kidlat at malakas na hangin sa Batangas.

Sinabi ng weather bureau na iiral ang lagay ng panahon sa susunod na dalawang oras.

Maliban dito, maaapektuhan din ng nasabing kondisyon ng panahon ang Quezon partikular sa Lopez, Buenavista, Calauag, Gumaca at General Luna.

Inabisuhan ang mga residente sa lugar na maging maingat sa posibleng pagbaha o pagguho ng lupa.