20 porsyento diskwento sa domestic flights, maaari nang ma-avail ng mga estudyante
Maaari nang ma-avail ng mga estudyante ang 20 porsyentong diskwento sa domestic flights.
Ito ay kasunod ng paglalabas ng Civil Aeronautics Board (CAB) ng guidelines ukol sa Republic Act 11314 o Student Fare Discount Act.
Ayon sa ahensya, maaaring ma-avail ang diskwento sa regular base fare ng domestic flight kabilang ang weekends at holiday.
Sakaling mayroong promotional fare, kailangang pumili ng estudyante kung kukunin ang promotional fare o babawasan ang regular fare.
Sakop ng benepisyo ang mga estudyante sa elementary, secondary, technical-vocational o higher education institution.
Hindi naman pasok sa benepisyo ang mga naka-enroll sa post graduate degree courses at informal short-term courses tulad ng dancing, swimming, music, driving lessons at seminar-type courses.
Kailangan lamang personal na magprisinta ng estudyante sa pagbili ng plane ticket ang school identification card o validated na enrollment form.
Maliban dito, kailangan ding iprisinta ng estudyante kahit isa sa mga sumusunod:
– birth certificate
– baptismal certificate
– latest school records (Form 137)
– naturalization certificate
– pasaporte
Matatandaang pinirmahan ni Pangulong Rodrigo Duterte ang batas noong April 17, 2019.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.