Wanted na Chinese naaresto sa Makati

Naaresto ng mga tauhan ng Bureau of Immigration (BI) ang isang Chinese national na wanted sa kanilang bansa.

Kinilala ang dayuhan na si Chen Long, 32 anyos na may alyas na Chen Chenglong.

Naaresto si Chen matapos ipabatid ng pamahalaan ng China na ito ay wanted at nagtatago dito sa Pilipinas.

Nabatid na umabot sa P400 million ang katumbas na halaga ng natangay ni Chen at kaniyang mga kasabwat sa pagtatayo ng isang hindi rehistradong investment company sa Shandong.

Nakakulong na ngayon ang dayuhan sa BI Detention Center sa Bicutan habang ipinoproseso ang deportation sa kaniya.