Nagtamo ng head injury ang isang day care teacher sa Makilala, North Cotabato makaraang protektahan ang kanyang mga estudyante mula sa malakas na lindol sa Mindanao.
Sa viral post ngayon ni Marky Mark Masamloc Ajero, sinabi nitong niyakap ng kanyang ina na si Erlinda ang mga estudyante habang lumilindol.
Nagtuturo ang kanyang nanay sa Rodero Day Care Center sa bayan ng Makilala.
Hindi ininda ng 61-anyos na guro ang falling debris sa kanyang likod at pinilit na ihatid palabas ng silid-aralan ang nasa 14 na estudyante.
Nagtamo ng matinding sugat ang ina matapos tangkaing iligtas ang naiwan pang mag-aaral sa kasagsagan ng lindol.
Tinamaan ng hollow blocks sa ulo si Erlinda at hindi na naabutan ang batang naiwan.
Nagising na lamang ang kanyang ina sa evacuation center at nailigtas din naman ang naiwang bata.
Sa ngayon ay nasa stable condition na ang guro at ipinananawagan ni Marky ang agarang paggaling ng kanyang nanay.
Ang mga nais magpaabot ng tulong sa guro ay maaaring kontakin si Marky sa numerong 09092292967.