Walang banta ng tsunami matapos ang M6.5 na lindol sa Mindanao – Phivolcs

Pinawi ng Phivolcs ang banta ng tsunami matapos ang pagtama ng magnitude 6.5 na lindol sa Mindanao.

Ayon sa Phivolcs hindi magdudulot ng tsunami ang malakas na lindol dahil sa kalupaan ito tumama.

Matapos ang 6.5 magnitude na lindol na tumama sa Tulunan, Cotabato alas 9:11 ng umaga ay magkakasunod na mahihinang aftershocks pa ang naramdaman sa Mindanao.

Ayon sa Phivolcs, magpapatuloy pa ang aftershocks kaya pinapayuhan ang publiko na manatili muna sa ligtas na lugar.

Pinaiiwas din ang mga residente sa mga pasilidad na labis na napinsala matapos ang tatlong magkakasunod na malakas na lindol sa Mindanao.