Klase sa Davao City ngayong araw suspendido na dahil sa panibagong malakas na lindol

Sinuspinde ang klase sa Davao City matapos tumama ang panibagong magnitude 6.5 na lindol sa Mindanao.

Sa inilabas na proclamation order number 10 ni Davao City Mayor Sara Duterte sinuspinde ang klase ngayong araw sa lahat ng antas public at private sa lungsod.

Suspendido na rin ang pasok sa trabaho sa government offices at hinihimok ang pribadong sektor na magsuspinde na rin ng trabaho.

Ito ay para matiyak ang kaligtasan ng lahat lalo at malakas ang naramdamang pagyanig ngayong umaga.

Ayon kay Duterte, lahat ng mga gusali sa lungsod na mayroong structural damages ay dapat agad bakantihin at ideklara nang condemned.